Saturday, 15 October 2011

Here
ek gryp vanoggend na 'n stukkie van U kleed...
my lewe le oopgevlek voor U voete

ek het niks om te offer behalwe myself nie

draai tog net om
en gooi my toe met U vrede
en helende krag...
                                                                                                               Santie Amery
                                                                                                                1999
In die wind se treurfluitnote hoor ek jou...
 ook die sagte smeekgebed so lank verlore met die jeug se nietigheid

die harde dop van daagliks voortgaan met my lewe
verkrummel fyn
om die deurskynwit van porselein
weer bloot te le
in al sy weerloosheid
en lankvergete pyn...
                                                                                              Santie Amery
                                                                                              1990

Wanneer?

Wanneer kom jy wat verby die gewone van bruin oe en 'n wipneus kyk,
wat luister
en die roepstem van my vrae hoor;
wat die fyn ou spinrakhoekies uit my hart sal lig
sodat die son se strale skitterend op elke draadjie dans?

Hoe lank sal dit nog duur voor jy besef
dat jy
die antwoord op my vrae is?
                                                                                                             Santie Amery
                                                                                                             1985
ek wil
 blaaie
vol gedigte skryf
die mure helderkleurig verf
met een sprong
die maan gaan vang
en die sterre
soos 'n mantel
om jou skouers hang...
sommer net
omdat jy vanaand
my vraag geantwoord het...                                       Santie Amery 1985